موت جو راڪاس بڻيل سيوهڻ کان ڄامشورو روڊ
اقصيٰ نطاماڻي
ڄامشورو جيڪوحيدرآباد کان 18 ڪلوميٽرن جي مفاصلي تي سنڌو
دريا جي ساڄي ڪناري تي واقعي آھي، اھوئي سنڌو درياءَ جنھن دنيا جي قديم تھذيب کي
جنم ڏنو ۽ سموري سنڌ کي پنهنجي ڇولين سان پالي ٿو، ڄامشورو شهر زميني رستي سيوهڻ
سان جڙيل آھي، سيوهڻ شهر جتي سنڌ جي عظيم صوفي شاعر حضرت لال شھباز قلندر جي مزار
قائم آھي جتي لکين ماڻھو حاضري لاءِ روز جي بنياد تي اچن ٿا تنهن جي ڪري سيوهڻ شهر
کي تمام گهڻي اهميت حاصل آهي.
سيوهڻ شهر کي ڄامشوري سان ملائڻ وارو رستو سنگل روڊ هئڻ جي
سبب گذريل ڪيترن ئي سالن کان موت جو راڪاس بڻيل آھي. صرف ھڪ سال جي اندر هڪ ھزار
کان مٿي حادثا پيش اچي چڪا آهن صرف پنجن مھينن اندر چار سئو کان وڌيڪ ماڻھوزندگي
جي جنگ ھارائي ويٺا آهن جنهن ۾ ڪيترائي ماڻهو هڪ ئي خاندان جا شامل آهن جنهن جا
سمورا خاندان ئي اجڙي ويا جڏھن ته زخمين جي تعداد هڪ سال اندر 26 سئو تائين پهچي
چڪو آهي ۽ اهو موت جو سفر اڃا تائين جاري ۽ ساري آهي.
سيوهڻ کان ڄامشورو روڊ تي حادثا ٿيڻ روز جو معمول بڻجي چڪو
آهي پر حادثن جي روڪٿام لاءِ ضلعي انتظاميا توڙي سرڪاري سطح تي ڪي به جوڳا قدم نه
کنيا ويا آهن، جنهن سبب ڪيتترن ئي مائرن جون هنجون خالي ٿي چڪيون آهن. جڏهن ته
ڪيترن ئي معصوم گلن جهڙا ٻارڙا هن ڌرتي جي وجود تي ٽڙڻ کان ئي پهريان ڪومائجي ويا
آهن. اهڙي صورتحال ۾ ڄامشورو سيوهڻ سنگل روڊ تي حادثن جي روڪٿام لاءِ نوجوانن،
سڄاڻ ڌرين سماجي اڳواڻن ۽ ڀرپاسي جي شھرين پاران هن سنگل روڊ کي ڊبل روڊ ڪرڻ جي
لاءِ تحريڪون پڻ هلايون ويون آهن پر نيشنل هاءِ وي اٿارٽي توڙي سنڌ سرڪار جي ڪن تي
جونَ به ڪان چري آهي. هلندڙ تحريڪ جي اڳواڻن سان ڪيترائي ڀيرا انتظاميه ڳالهيون
ڪري فوٽو سيشن ڪري وڏا واعدا ڪري صرف مطعمن ئي ڪيو ويو آهي.
جڏهن ته قانوني
حوالي سان ڄامشوري سيوهڻ روڊ بابت 23 آگسٽ 2017 تي سنڌ هاءِ ڪورٽ، ايڊووڪيٽ سيد
ميرجت ۽ ٻين وڪيلن جي درخواستن تي تاريخي فيصلو ڏيندي حڪم ڏنو هو ته انڊس هاءِ وي
تي وڏين گاڏين کي گذرڻ کان روڪيو وڃي، ايمرجنسي سينٽڙ قائم ڪيو وڃي ۽ ايمبولينس
سروس پڻ مقرر ڪئي وڃي پر سنڌ هاءِ ڪورٽ جي مٿين حڪم باوجود سنڌ سرڪار عمل ڪرائڻ ۾
مڪمل طور ناڪام وئي آهي، جنهن جي نتيجي ۾ اهڙا انڪشاف پڻ ٿيا آهن ته پوليس رشوت
وٺي وڏين گاڏين کي هي خطرناڪ روڊ استمال ڪرڻ جي اجازت ڏئي ڇڏي ٿي. جنهن سبب 17
سيپٽمبر 2017 تي ايڊووڪيٽ سيد ميرجت ۽ ٻين وڪيلن جي داخل ڪيل درخواست تي سنڌ هاءِ ڪورٽ جي حڪم تي
عمل نه ٿيڻ سبب جسٽس صلاح الدين پنهور پاران نيشنل هاءِ وي اٿارٽي، موٽروي پوليس ۽
ٻين لاڳاپيل ادارن کي توهين عدالت جا نوٽيس پڻ جاري ڪيا هئا. سنڌ هاءِ ڪورٽ گذريل
پنجن سالن اندر ڄامشوري سيهوڻ روڊ تي حادثن ۾ فوت ۽ زخمي ٿيل ماڻهن جا تفصيل گڏ
ڪري انهن کي معاوضو ڏيارڻ لاءِ ڪميشن پڻ قائم ڪيو آهي.
ڄامشورو سيوهڻ روڊ تحريڪ کان پوءِ وزير اعليٰ سنڌ سيد مراد
علي شاھ ڊسمبر2017 تي سيهوڻ کان ڄامشورو ڊبل روڊ منصوبي جو افتتاح پڻ ڪيو جنهن ۾ وزير
اعليٰ سنڌ سيد مراد علي شاھ وڏا اعلان ڪندي چيو هو ته هي منصوبو ٻن حصن ۾ مڪمل
ٿيندو پهرين حصي ۾ ڄامشوري کان مانجهند تائين تقميل تائين پهچايو ويندو ۽ ٻئين حصي
۾ مانجهند کان سيهوڻ تائين روڊ کي مڪمل ڪيو ويندو، وزير اعليٰ سنڌ سيد مراد علي
شاھ وڏيون ڳالهيون ڪندي هي به فرمايو هو ته هي منصوبو نه صرف سيوهڻ ۽ ڄامشوري جي
ماڻهن کي فائدو ڏيندو پر هي منصوبو سموري ملڪ لاءِ فائديمند ثابت ٿيندو،. پر افسوس
سان چوڻو ٿو پوي ته وزير اعليٰ سنڌ جي افتتاح کانپوءِ اهو منصوبو اڄ تائين شروع نه
ٿي سگهيو آهي ۽ سيوهڻ کان ڄامشورو روڊ اڃا تائين مڪمل موت جو راڪاس بڻيل آهي ۽
روزانه ڪيتريون ئي انساني جانيون ڳڙڪائي رهيو آهي.
سنڌ حڪومت کي گهرجي ته جلد کان جلد موت جو راڪاس بڻيل سيوهڻ
کان ڄامشورو روڊ جو ڪم شروع ڪرائي ڊبل روڊ کي مڪمل ڪيو وڃي ته جئين انساني جانيون
ضايع ٿيڻ کان بچي سگهن.
اقصيٰ نطاماڻي
ميڊيا ايند ڪميونيڪشن اسٽيڊيز
سنڌ
يونيورسٽي ڄامشورو
2k16/MC/13
No comments:
Post a Comment